مون سون بارشوں سے178 افراد جاں بحق،491 زخمی

تفصیلات کے مطابق این ڈی ایم اے کی جانب سے 26 جون سے 17 جولائی تک مون سون بارشوں سے ہونے والے جانی و مالی نقصانات کی رپورٹ جاری کردی گئی۔

این ڈی ایم اے کی رپورٹ کے مطابق ملک بھر میں بارشوں کے باعث مجموعی طور پر اب تک 178 افراد جاں بحق اور 491 زخمی ہوئے۔

یہ بھی پڑھیں:۔شدید بارش،راولپنڈی میں آج تعطیل کا اعلان

رپورٹ کے مطابق پنجاب میں 385 افراد زخمی اور 103 جاں بحق ہوئے، جن میں 50 بچے بھی شامل ہیں۔ خیبرپختونخوا میں 38 اموات اور 57 افراد زخمی ہوئے۔ سندھ میں 20 افراد جاں بحق اور 40 زخمی ہوئے۔ اس کے علاوہ بلوچستان میں 16 اموات اور 4 افراد زخمی ہوئے جبکہ آزاد کشمیر میں ایک شخص جاں بحق ہوا۔

یہ بھی پڑھیں:چکوال میں کلاؤڈ برسٹ،423 ملی میٹر بارش،ڈیم ٹوٹ گیا

این ڈی ایم اے کی رپورٹ کے مطابق گزشتہ 24 گھنٹوں میں بارشوں سے 54 افراد جاں بحق ہوئے، جن میں 22 بچے بھی شامل ہیں، 54 افراد پنجاب میں جان کی بازی ہار گئے۔ اس کے علاوہ گزشتہ 24 گھنٹوں میں 227 زخمی ہوئے، زخمیوں کا تعلق بھی پنجاب سے ہے۔

این ڈی ایم اے کے مطابق ملک بھر میں گزشتہ 24 گھنٹوں میں 88 گھروں کو نقصان پہنچا، مجموعی طور پر اب تک 610 گھروں کو نقصان پہنچا جبکہ 126 مویشی پانی میں بہہ گئے۔