محی الدین محمد ابن العربی
پیدائش: 26 جولائی 1165ء
وفات: 16 نومبر 1240ء
۔۔۔۔۔۔۔۔۔۔۔۔۔۔۔
محی الدین محمد ابن العربی اندلس وچ پیدا ہوئے۔ پر انھاں نی جوانی ناں زمانہ اشبیلیہ وچ گذریا۔ انھاں کی تصوف وچ بڑی اچی جاء لبھی۔ وحدت الوجود ناں تصور آخیا گشناں کہ سب تھیں پہلیاں انھاں پیش کیتا۔
اس نظریے نے مطابق توحید یاء نئی جے خدا کہلا (واحد و یکتا) بلکہ توحید یا ای جے اللہ نے سویر کائنات وچ کوئی دووآ وجود تھیا یے نا۔۔ نالے تمام مخلوق اسے نی ذات نا حصہ ای۔۔ اس واستے مخلوق کی اس نی ذات سی لاحدے کری تے مت دکھو۔
ابن عربی ناں قول آ جے باطنی نور خود رہنمائی کرناں۔ بعض علما انھاں نیں اس عقیدے کی الحاد منیا پر تصوف والے انھاں کی شیخ الاکبر آخنے۔ انھاں کوئی پنج سو نیں قریب کتاباں لخیاں پر تصوف آلیاں نیں نزدیک فصوص الحكم تے الفتوحات المکیہ نی اہمیت بہوں زیادے ای۔
تصوف نا سلسلہ ابن العربی نیں خاندان وچ پہلیاں سی قائم ایسا۔ اشبیلیہ وچ انھاں کی اس ویلے نیں بڑے بڑے عالماں کولا علم سکھنے نی سعادت لبھی۔ اس ویلے نی دینی تے دنیاوی تعلیم نے حصول نیں نال نال اتھیں انھاں کی صوفیاء نی خذمت ناں وی موقع لبھا جس انھاں نی سوچ تے حیاتی بدلی شوڑی۔۔ انھاں نیں اپنے بیان نیں مطابق ویہہ سال نی عمر وچ اشبیلیہ وچ ہک امیر کبیر آدمی نی دعوت وچ اوہ ہور رئیساں نیں پتراں نال موجود ایسے۔ جسلے شراب ناں دور شروع وہا تے انھاں کی آواز آئی کہ "کیہہ توئی اس کم آستے پیدا کیتا گا”۔ اوہ اتھاں اٹھی چلے گئے۔۔ ہک چرواہے نال کپڑے بدلائی تے ذیلانے وچ ہک پہجی ہوئی قبرے وچ بئی تے ذکر کرنے کی لگی پئے۔ بس نماز پڑھے واستے باہر لکڑنیں سے۔ چار تیہاڑیاں سی بعد جسلے اوہ اتھاں لکڑے تے انھاں کول علوم نیں خزانے سے۔ ابن سودکین اس کی اسرے روایت کیتا :
” مہاڑی خلوت فذریں ویلے شروع ہوئی تے فتح (اسرار نا کھلنا ) طلوع الشمس سی پہلیاں وقوع وچ آئی۔ فتح سی بعد مہاڑے اپر ” ابدار” نی حالت وارد ہوئی تے اس سی لاحدے دووئے مقامات ترتیب وار آئے۔ میں اپنی جائی اپر چودہ مہینیاں توڑی کھلتا رہیا یاں تے انھاں سارے اسرار تک پوہچ حاصل کیتی، جنھاں کی میں فتح سی بعد تالیف کیتا۔ مہاڑی فتح اس لحظہ وچ ہک جذب (نی طرح ) سی ” ۔
ابن عربی ” ابدار” نی تشریح دووئی جائی اپر اسرے فرمائی :
” ابدار کو اس نے عالم میں اپنی تجلی کی مثال کے لئے اپنے حکم سے نصب کیا ہے ۔ پس وہ خلیفہ الٰہی ہے ، جو عالم میں اللہ کے اسماءاور احکام اور رحمت اور قہر اور انتقام اور عفو کے ذریعہ ظاہر ہوتا ہے ، جیسے سورج ظاہر ہوتا ہے چاند میں اور جب وہ پورے کو روشن کر دیتا ہے ، تو اس کو بدر (پورا چاند) کہتے ہیں ۔ گویا سورج اپنے آپ کو بدر کے آئینے میں دیکھتا ہے۔
وحدت الوجود نیں فلسفے سی دنیا جہان نیں لاتعداد لوک متاثر ہوئے۔۔ وحدت الوجود کی مننے والے کی کائنات نی ہر شے وچ الله نا جلوہ نظر اشناں۔ ہندوستان وچ خواجہ معین الدین چشتی، خواجہ بختیار کاکی، خواجہ غلام فرید، تے سلسلہ چشتیہ نے صوفی وحدت الوجود یا ہمہ اوست نے قائل سے۔ ڈچ فلسفی سپینوزا، جرمن شاعر گوئٹے، برٹش شاعر ورڈس ورتھ، کیٹس، تے شیلے، امریکی نثرنگار تے شاعر رالف ایمرسن، تے سائنسدان آئن سٹائن نا شمار وی وحدت الوجود نے مننے آلیاں وچ ہونا۔
فقہ اُصول عقائد نوں
رکھ ملت ابن العربی دی
ہے دلڑی غیروں پاک تری
مصباح عجب مشکوٰۃ عجب
ہر صورت وچ دیدارِ ڈٹھم
کل یار اغیار کوں یار ڈِٹھم
کتھ پھل گل باغ بہار ڈٹھم
کِتھ بلبل زار نزار ڈِٹھم
کِتھ خس خاشاک تے خارِ ڈٹھم
ہک نور دے سَبھ اطوار ڈِٹھم
تینوں عرش کہوں افلاک کہوں
تینوں ناز نعیم جنان کہوں
تینوں تت جماد نبات کہوں
حیوان کہوں انسان کہوں
تینوں مسجد مندر دیر کہوں
تینوں پوتھی تے قرآن کہوں۔
۔۔۔۔۔۔۔۔۔۔ خواجہ غلام فرید
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
راشد عباسی