بنکر میں چھپ کر بیٹھنے والےکو عوام نشان عبرت بنا دیں گے۔مریم نواز

نواز لیگ  کی چیف آرگنائزر و سینئرنائب صدر مریم نواز نے تحریک انصاف کو آڑے ہاتھوں لیتے ہوئے کہا ہے کہ نوازشریف کی سیاست ختم کرنے والی جماعت کرچی کرچی ہو گئی،ان کا کہنا تھا کہ بنکر میں چھپ کر بیٹھنے والے کو عوام نشان عبرت بنا دیں گے۔

پیر کے روز  آزاد کشمیر کے شہر باغ میں مشتاق منہاس کے انتخابی جلسے سے خطاب کرتے ہوئے مریم نواز نے کہا کہ شہدا کی بے حرمتی کرنے  اور مجسمے توڑنے والا پاکستانی نہیں ہو سکتا۔انہوں نے کہا کہ 9 مئی کو جو کچھ ہوا اس پر پورا آزاد کشمیر شرمندہ ہے، شہدا کے ساتھ ایسا سلوک کرنے والے کو قوم معاف نہیں کرے گی، وہ چھپ کر بنکرمیں بیٹھا ہے،مگر عوام اسے نشان عبرت بنا دیں گے۔انہوں نے کہا کہ یہ شخص ٹرمپ کے پہلو میں بیٹھ کر کشمیر کا سودا بھی کر آیا تھا، قوم اسے معاف نہیں کرے گی۔ ترقیاتی منصوبوں کا ذکر کرتے ہوئے مریم کا کہنا تھا کہ 75 برسوں میں سے اگر نوازشریف کے 9 سال نکال دو تو کچھ نظرنہیں آتا،

نواز شریف اور ترقی لازم و ملزوم ہیں جبکہ  گھیراؤ جلاؤ، فتنہ بازی کی سیاست سے کون یاد آتا ہے، جب کسی کے پاس کارکردگی نہ ہو تو ایسی حرکتیں کی جاتی ہیں، جس کو مسلط کیا گیا آج وہ جماعت کہاں گئی؟ جہاں سے آئی تھی، وہیں واپس چلی گئی۔مریم نواز نے کہا کہ آزاد کشمیر کا سابق وزیراعظم اس کیخلاف گواہی دے رہا ہے،  نوازشریف کے کئی دشمن آئے اور گئے، مشرف دور سے یہی کچھ دیکھ رہے ہیں، اللہ تعالیٰ نواز شریف کو بار بار لے کر آتا ہے۔

انہوں نے کہا کہ نوازشریف نے کبھی پاکستان پرآنچ نہیں آنے دی، کل جو کہتا تھا میں اکیلا ہی کافی ہوں آج اکیلا ہی رو رہا ہے، آج کل صبح و شام، رات کو روتا ہے، جس کو رلانا تھا وہ مسلم لیگ (ن) آج ڈٹ کر کھڑی ہے۔مریم نواز نے کہا کہ نواز شریف کشمیر کا بیٹا ہے، آج تک کسی نے مسلم لیگ کے وزیراعظم آزاد کشمیر پر بدعنوانی کا الزام نہیں لگایا، اس نے اپنے خرچ کا ذمہ ان حکومتوں کے ذمے کیا ہوا تھا، ترقی، اچھی سڑکیں، اچھے کالج، یونیورسٹیز باغ والوں کا حق ہے، مشتاق منہاس کو ووٹ دیں باغ میں دل کے ہسپتال کو مکمل کرائیں گے، جس جماعت نے ترقیاتی کام کرائے اسے ووٹ دینا۔