امریکی وفد نے منرل ڈیویلپمنٹ میں دلچسپی ظاہر کر دی
امریکہ سے آئے ہوئے اعلیٰ سطحی وفد نے جی ایچ کیو میں آرمی چیف جنرل سیدعاصم منیر سے ملاقات کی، اور پاکستان کی پالیسی پر اعتماد کا اظہار کیا،اس موقع پر
وفد نے منرل ڈیولپمنٹ کے شعبے میں تعاون کی خواہش کا اظہار بھی کیا۔
وفد نے وزیراعظم سے بھی ملاقات کی .اس موقع پروزیراعظم شہبازشریف نے کہا کہ امریکی سرمایہ کار پاکستان میں معدنیات کے شعبے میں سرمایہ کاری کے موا قع سے فائدہ اٹھائیں۔
پاک فوج کے شعبہ تعلقات عامہ سے جاری بیان کے مطابق چیف آف آرمی اسٹاف جنرل عاصم منیر سے جی ایچ کیو میں امریکہ کے جنوبی اور وسطی ایشیائی امور کے بیورو کے سینئر عہدیدار ایرک میئر کی سربراہی میں اعلیٰ امریکی وفد نے ملاقات کی۔ بیان میں کہا گیا کہ یہ ملاقات پاکستان منرل انوسٹمنٹ فورم کے انعقاد کے موقع پر ہوئی ہے اور وفد نے پہلی نوعیت کے پہلے فورم کے انعقاد کو سراہا اور باہمی منافع بخش شراکت داری کے ذریعے معدینات سے متعلق پاکستان کی پالیسی پر اعتماد کا اظہار کیا۔
امریکی وفد کے سربراہ ایرک میئر نے امریکی انتظامیہ کی ترجیحات پر بات کرتے ہوئے کہا کہ پاکستان کے ساتھ معدنی ترقی میں اشتراک باہمی مفاد کا بنیادی پہلو ہے اور انہوں نے پاکستان میں سرمایہ کاری کے شعبے میں بتدریج بہتری پر بھی دلچسپی کا اظہار کیا۔ آئی ایس پی آر نے بتایا کہ ملاقات سے دونوں فریقین کو عالمی سطح پر ہونے والی پیش رفت اور پاکستان کی علاقائی سیکورٹی کے اہداف پر ایک دوسرے کا مؤقف جاننے کا موقع ملا۔ فریقین نے باہمی تعلقات کی مثبت پیش رفت پر اظہار اطمینان کیا اور مزید پہلو شامل کرنے اور تعلقات کو جامع انداز میں مضبوط بنانے کے لیے جی ٹو جی اور پی ٹو پی تعاون میں توسیع کی ضرورت پر اتفاق کیا۔
وزیراعظم شہبازشریف سے امریکی قائم مقام اسسٹنٹ سیکرٹری ایرک میئرکی قیادت میں امریکی وفد نے ملاقات کی، وزیراعظم نے امریکہ کے ساتھ دوطرفہ تعلقات کو مضبوط بنانے کے لئے صدر ڈونلڈ ٹرمپ اور ان کی انتظامیہ کے ساتھ مل کر کام کرنے کی پاکستان کی خواہش کا اظہار کیا۔وزیر اعظم نے تجارت اور سرمایہ کاری کے ساتھ ساتھ انسداد دہشت گردی سمیت باہمی دلچسپی کے شعبوں میں تعاون بڑھانے کی اہمیت پر زور دیا۔قائم مقام اسسٹنٹ سیکرٹری ایرک میئر نے پاکستان منرل انویسٹمنٹ فورم کے کامیاب انعقاد پر وزیراعظم کو مبارکباد دی۔انہوں نے پاکستان کے معدنیات کے شعبے کی وسیع استعداد کا اعتراف کرتےہوئےامریکی کمپنیوں کی جانب سے اس شعبے میں سرمایہ کاری میں دلچسپی سے آگاہ کیا۔ایرک میئر نے مشترکہ دلچسپی کے امور پر پاکستان کے ساتھ کام کرنے کی امریکی خواہش کا بھی اظہار کیا۔