امراؤ جی کا گیت
بھارومل امرانی سوٹہڑ
جب محبت صحرا بن جاتی ہے، وفا کے سرابوں میں مسافر آنکھیں اپنے پیارے کی راہ تکتے تکتے تھک جاتی ہیں تو اس کو ڈھونڈنے آنسو نکل پڑتے ہیں۔ وصل کی بارش کی تڑپ دھوپ میں ریت پر مزید آگے چلنا سکھاتی ہے۔ لیکن پریت کے عکس کے سوا کچھ سجھائی نہیں دیتا، ایسی کیفیت میں دل کی دھڑکن کو تال بنا کر امراؤ جی کا لوک گیت گایا جاتا ہے۔
اس لوک گیت کا کردار امراؤ جی ایک راجپوت تھا۔ قحط کے دنوں میں امراؤ جی تھر سے دور چلا گیا۔ پیچھے اس کی بیوی نے ہجر کی تاریک راتوں میں اپنے پیارے ساجن کے درمیانے قد، سانولے رنگ اور راجپوتی مونچھ کو یاد کرتے ہوئے یہ لوک گیت گایا تھا۔ اس لوک گیت میں جدائی کا گھاؤ ہے، تو مرہم کا خواب بھی ہے۔ لوک دانائی کے بول ہیں تو عقل اور عشق کی باہمی کشمکش بھی ہے۔
سارن پڑی ٹھیکری گھس گھس پتلی ہوئی،
پردیسی ری گور ری جھر جھر پنجھر ہوئی
جی سردار مہانے ایک وار صورت دکھاؤ مہاراج
امراؤجی ہو رسیا۔۔۔۔۔۔۔۔۔۔۔۔۔۔۔۔۔
بیگن تو کاچا بھلا، پاکی بھلی انار
پریتم تو پتلا بھلا، موٹا جاٹ گنوار
جی امراؤ تھاری چال پیاری پیارو لاگے مہارو راج
امراؤ جی رسیا۔۔۔۔۔۔۔۔۔۔۔۔۔
جب آیا پردیس سوں جاجم دیو پچھائے
تن من کی پوچھیاں ہینوڑے لو لگائے
جی امراؤ تھاری صورت پیاری لاگے مہارا راج
امراؤ جی رسیا ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چار کونت واؤری جے میں سیتل نیر
آپاں رلمل جھلیاں، او لال نندل را ویر
او امراؤ تھیں حکم کرو دھن ہاجر مہارا راج
امراؤ جی رسیا۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ترجمہ :
میرے پیارے محبوب میں تیری جدائی میں کنویں کی سارن میں پڑی ٹھیکری کی مانند
گھس گھس کر دبلی ہو گئی ہوں
پردیسیوں کی راہ تکنے والیوں کی آنکھیں ایسے اجڑ جاتی ہیں۔
میرے من کے سردار میرے مہاراج امراؤ جی رسیا ایک بار اپنا دیدار کراؤ
میرے بالم بیگن کچے اچھے ہوتے ہیں، اور انار پکے ہوئے ،
پریتم دبلے اچھے اور موٹے تو جاٹ گنوار ہوتے ہیں۔
میرے مہاراجا امراؤ جی رسیا تمہاری چال پر میں قربان جاؤں
میرے مہاراج امراؤ جی رسیا۔۔۔۔۔۔۔۔۔۔۔
میرے بالم جب تم پردیس سے آؤ گے تو میں منقش کپڑا فرش پر بچھاؤں گی
تن من کی سدھ کیسے ہوگی بس تم مجھے اپنے دل سے لگا لینا۔
میرے بالم تمھاری صورت بہت پیاری ہے۔
میرے مہاراج امراؤ جی رسیا۔۔۔
چاردیواری والے حوض میں صاف شفاف پانی بھرا ہے
ہم دونوں مل کر نہائیں گے
میری نند کے بھائی میرے بالم بس تم حکم کرو
تمہارے ہر حکم کی تعمیل کرتے ہوئے میں تیری پتنی (بیوی) حاضر ہوں
میرے بالم میرے رسیا! میرے مہاراج امراؤ جی رسیا ۔۔۔۔