اسرائیلی وزیراعظم کے غیرذمہ دارانہ بیان،پاکستان کی شدیدمذمت
پاکستان نے اسرائیلی وزیراعظم بنجمن نیتن یاہو کے حالیہ غیر ذمہ دارانہ بیان کی شدید الفاظ میں مذمت کی ہے جس میں انہوں نے فلسطینی عوام کو سعودی عرب میں ایک ریاست کے قیام کی تجویز دی تھی۔
پاکستان کے ترجمان دفتر خارجہ شفقت علی خان ے اس بیان کو غیر ذمہ دارانہ اور اشتعال انگیز قرار دیتے ہوئے کہا کہ یہ تبصرہ سوچا سمجھا اور جارحانہ ہے۔
نائب وزیراعظم اسحاق ڈار نے کہا کہ اسرائیلی وزیراعظم کا یہ بیان فلسطینی عوام کے حق خود ارادیت اور ان کی تاریخی سرزمین پر ایک آزاد ریاست کے قیام کے جائز حقوق کی خلاف ورزی کرتا ہے،اسحاق ڈار نے مزید کہا کہ پاکستان سعودی عرب کے ساتھ بھرپور یکجہتی میں کھڑا ہے اور فلسطینی عوام کے حق میں سعودی عرب کی مستقل حمایت کی قدر کرتا ہے۔
انہوں نے اس بات پر زور دیا کہ سعودی عرب کے موقف کو کمزور کرنے کی کوئی بھی کوشش انتہائی افسوسناک ہے اور پاکستان فلسطینی عوام کے حقوق کی حمایت میں اپنی پختہ وابستگی کا اعادہ کرتا ہے،انہوں نے عالمی برادری پر زور دیا کہ وہ اسرائیل کے اس اشتعال انگیز بیان کی مذمت کرے اور اس کو امن عمل کے لیے جوابدہ ٹھہرائے۔
پاکستان پختہ یقین رکھتا ہے کہ فلسطینی عوام کو 1967 کی سرحدوں کے مطابق آزاد اور خودمختار ریاست کا قیام کا ناقابل تنسیخ حق حاصل ہے جس کا دارالحکومت القدس شریف ہو، انہوں نے اس بات کا اعادہ کیا کہ کوئی بھی تجویز جو فلسطینی عوام کو ان کے آبائی وطن سے بے گھر کرنے کی کوشش کرتی ہے وہ ناقابل قبول ہے اور بین الاقوامی قانون، اقوام متحدہ کی قراردادوں اور انصاف کے اصولوں کی کھلی خلاف ورزی ہے۔